حل مشكلة والد زوجي يكرهني متسلط ويتحكم في حياتنا عالم حواء

 والد زوجي يكرهني، متسلط وأناني، والد زوجي يعيش معنا، والد زوجي يتحكم في حياتنا، والد زوجي شخص مسيطر يذل زوجي أمامي، ويضربني أمام زوجي، ما حكم تدخل والد الزوج بحياة ابنه مع زوجته.

مشكلتي نادرة الحدوث، لأن الشائع إن أم الزوج هي الشريرة، واللي تكره الزوجة، وتنكد عليها حياتها، لكن في حالتي أنا الأمور صايرة بالعحقي، أم زوجي متوفية من زمان، ووالد زوجي هو النكدي في القصة، عايش معنا، أو بالأصح نحن عايشين معه، في بيته، وهو من بداية زواجنا ويمكن حتى من قبل زواجنا ما كان راضي عن سكنا معه في البيت، لكن زوجي أصر يسكن عند أبوه منها توفير ومنها ياخذ باله منه، 

لكن العجيب في الموضوع إن زوجي ذليل عند أبوه وماله كلمة، وأبوه ريال شراني، حقود، وناري، يحب المشاكل، ولسانه سليط، وكريه، ومحد يحبه، ومسيطر ومتسلط ويتدخل في كل صغيرة وكبيرة في حياتنا، ومن معاملته لزوجي فهمت ليش شخصية زوجي ضعيفة، وليش ما يقدر يبعد عن أبوه، في علاقة مريضة بينهم، زوجي يحب تعذيب أبوه له، ويحب يلعب دور المسكين والضحية، وأبوه يحب يشوفه محقيور، عيلة معقدة ومريضة.

طبعا أنا ما كنت أعرف كل هالتفاصيل قبل الزواج، ولكن اكتشفت بالتدريج من ملاحظتي للمواقف والأحداث، ولاحظت إن زوجي يجن إذا مر يوم وأبوه ما عنفه أو أهانه، يعني يقعد في الصالون ينتظر أبوه يمر ويقول له كلمة قاسية، يمكن تعتقدون الحين إني أبالغ، لكني في البداية كنت أقول في نفسي مجرد صدفة، ما يقصد، لكن بعدين تأكدت زوجي ما يرتاح إلا بعد ما أبوه يهينه، وبعدها يدخل ينام وهو مبسوط بعد… 

المهم المشكلة الكبيرة صارت قبل اسبوعين، والد زوجي جلس ينتقد زوجي بطريقة جارحة، ويهينه ويقول له أنت مو رجال، وأنت مسوين فيك، وكلام قذر ما فيه أب يقوله لأبنه مهما كان الأب قذر وخسيس، لكن والد زوجي كان يقوله لزوجي، وزوجي طبعا كان يبكي ويترجاه يسكت، …!!!

قمت أنا وقررت اتدخل، وقلت لوالد زوجي: أنت واحد مريض ومحتاج علاج نفسي روح تعالج” ما خلصت كلمتي الأخيرة، إلا وطراق اشكبره نزل على وجهي من يد زوجي، وأنا طبعا انصدمت، لأني كنت أدافع عنه، والمفروض إنه يساندني، ضد الظلم اللي يمارسه أبوه علينا في حياتنا، لكن زوجي أختار إنه يبر أبوه على حسابي، وعلى حساب كرامتي، 

في ذيك اللحظة قررت أترك البيت لأني تعبت، تعبت من هالعيشة اللي أبوه يتدخل في كل تفاصيلها، وتعبت من شكل زوجي المهان كل يوم، والمصيبة إن أبوه بعد ما رديت عليه صار يصرخ عليه ويقول له ( طلقها ) … وزوجي وقف يناظر فيني وعيونه كلها دموع، وكأنه يلومني لأني رديت على  أبوه، وأبوه استمر يصرخ عليه ويقول له طلقها، الحين طلقها… وزوجي طلقني، لكن أبوه قال له طلقا ثلاث… وهنا زوجي ترك البيت وطلع، 

وأنا طبعا رحت غرفتي وجمعت ملابسي ورحت بيت أهلي، وكل نيتي إني ما أرجع له أبد، لأني زهقت من شخصيته الضعيفة، وتعبت من أبوه، ومن الجو السلبي اللي عايشين فيه، 

جاني من يومين يعتذر، ويريد يرجعني، لكني اشترطت عليه بيت نعيش فيه لحالنا، وطبعا رفض، وقال إنه ما يصلح يخلي أبوه لحاله، لأنه كبير في السن، ومن ذا الكلام، وأنا قلت له هذا شرطي الأهم والوحيد، وقلت له بيت أبوك ما أرد له لو الموت، تريدني أرجع خذ لي بيت وأنا مستعدة أساهم معك في الإيجار… !!! 

هل أنا غلطانه؟ ما فيه داعي أشرح لكم إنه زوجي ما منه فايدة، لأني حاولت على مدى فترة زواجنا أقوي شخصيته ضد أبوه، وعلشان كذا كان أبوه يكرهني كره العمى، ويتمنى طلاقي، ولقاها فرصة يوم إني واجهته ذك اليوم، لكن زوجي مثل المغيب ما يشوف الحقيقة، ولا قادر يدرك إن علاقته مع أبوه علاقة سامة، وكل شوي يقول بر الوالدين وبر الوالدين، طيب يعني كيف يبر إنسان ما يباله الخير، ويسبه ويهينه ويبهذله طول اليوم.

في ضميري خايفة أكون ظلمت زوجي بقراري، لأني أعرف إنه ما يقدر يطلع ويخلي أبوه لأنه ضعيف الشخصية، وفي الوقت نفسه ما أقدر أتحمل أكثر بصراحة، كل إنسان وله طاقة محدودة من الصبر والاحتمال

يمكنك أن تترك  هنا

تعليقك على المشكلة  كمجهول، 

دون الكشف عن هويتك،

رواية رومانسية جريئة ساخنة رائعة..​