حل مشكلة زوجي ضربني وصرت اخاف منه بالتفصيل

إلحقوني، صار شاي ما عمري توقعته، زوجي صار يضربني من فترة وصرت أخاف منه، يمه يمه كيف صاير ما عمري شفته جذيه، كله يصارخ وكله محتر وما أدري شنو السبب!

محاور المشكلة

تهقون متعرف على وحده وولهان عليها، تهقون يخوني وندمان تزوجني، تهقونه يجتلني بنات ؟!! صدقوني ما أتوهم زوجي صاير يخرع، يضربني في الطالع والنازل، بمناسبة ومن غير مناسبة، أقوله شنو فيك شمسوية أنا فيك، ليش تطقني شمسوية فيك؟ يطقني أكثر وما يرد علي.

تعبت إمنه لين متى اتحمله، حاولت أفتش مني مناك أدور سبب، أقول يمكن وحده من هالبنات لفت له راسه، لكن ما حصلت شيء ما عنده، ولا شيء، تيلفونه فاضي ما فيه أي شيء غريب.

وطول الوقت في البيت ما يطلع، يعني لو عنده وحده بيطلع عشان يحاجيها، مو هذا الطبيعي، ليش ما يحاجيها زين ! اساسا ما يطلع كله يالس في البيت، صاك على عمره غرفة المكتب وما يحاجي أحد، وقاط تيلفونه بالصالة جدامي محد يدق عليه.

البارحه طلع من المكتب يسألني وين الإقهوة، قلت له ما طلبت إقهوة أهنا! وأنا الصاجة ما طلب إقهوة الريال، قال لي بلا طلبت ! وقام يصارخ في ويهي لا خيل ولا مستحى، أنا من شفته يصارخ ركضت على غرفتي، وقفلت الباب، خلاص ما صرت أثق فيه، لأنه كل مره يصرخ عقبها بثواني يطقني

من يومين طاقني طق، ما فججني منه غير الشغالة خهنا حيلي، وحطها فوقي وطقها معاي

هالريال ين بنات ولا !!! ما أدري احاجيه إذا هدا ولا شالصرفة معاه، كلمت صديقتي وهي تعرف في المشاكل قالت لي يمكن الريال مستلبس، يعني حايشه يني !!!

فكرت أسأله ليش ما يداوم، يمكن مستقيل أو فاصلينه من شغله، بس مستحيل ما يفصلون عندنا أحد من شغله، لكن ما ادري شنو قصته ما يروح الدوام، وخايفه أسأله يقوم يصارخ علي ويطقني.

والله ما ادري شو الحل معاه؟ بنات الله يرضى عليكم جاوبوني زوجي اشفيييييييييييييه !!!
ليش ين فجأة وصار يطقني؟! من عندها خبره بهالمواضيع!

اقرئي أيضا في قسم الإستشارات الزوجية:

​​